Archives For twitter

Maiatzean jauzi bat nabari da euskarazko hedabideen munduan, Twitterreren erabilerari dagokionez. Jarraitzaile berrien kopuruak gora egin du modu orokor batean. Joera hau, neurriren batean, bat dator Umap-en robotak atzemandako tuiterlari aktiboen kopuruaren bilakaerarekin. Joan den apirilean, 5.292 tuiterlari aktibo eta eguneko euskarazko 8.378 mezu  atzeman zituen. Maiatzean, berriz, 5.413 tuiterlari aktibo eta eguneko 8.902 mezu. Aktibitatea hazi da, neurri txikian bada ere.

Euskarazko hedabideen datuak kontuan hartuta, maiatzean bizkortze bat gertatu dela jarraitzaile berrien kopuruari dagokionez. Hedabide aktiboenak dira emaitza hoberenak lortzen dituztenak (Berria edo Argia adibidez). Maiatzeko datu hauekin lotuta egon daiteke Askegunea bezalako fenomeno soziala. Holako egoeratan oso erabilgarri bilakatzen delako Twitter bezalako tresna bat.

Jarraitzaile kopuruaren araberako sailkapenean, hilero bezala, aldaketa gutxi daude. Lehen lau postuak apirilean bezala daude maiatzaren 31ko datuetan: 1. @berria (17.470), 2. @gaztea (16.261), 3. @argia (9.019), eta 4. @HamaikaTb (5.311). Bosgarren postua @euskadi_irratia-k kendu dio @Sustatu-ri. Horrez gain, Tolosaldeako Hitzak irabazi du postu bat.

Hona hemen euskarazko hedabideen sailkapena, Twitterreko jarraitzaile kopuruaren arabera:

sailkapena-maiatza-2013

 

 

Hona hemen, hedabide batzuen bilakaera, jarraitzaile berrien kopuruaren arabera:

 

jarraitzaile berriak-05

Advertisements

Zenbat gara? Zenbat tuiterlari euskaldun gara? Umapek bota da du galdera eta erantzuna ematen saiatu da. Apirileko azkenengo datuen arabera, 4.237 euskal tuiterlari aktibo atzeman ditu Umapen robotak. Bat baino gehiago harrituko zen zifrarekin. Adibidez, Iñaki Larrañaga Twitterren: “Berriak 16.000 jarraitzaile ditu. Herenak besterik ez du euskaraz egiten? Baliteke salbuespen asko dagoelako, baina harrigarria da”. [Berriak zehazki 16.686 jarraitzaile ditu gaurko datuen arabera].

Umapek berak erantzun dio desfasea azaldu asmoz, eta hiru arrazoi eman ditu: “1) Twitter kontuen %50 inguru ‘hilda’ dago; 2) gure jarraitzaile asko spamerrak dira; 3) askok euskaraz jakin, baina egin ez”. Egia da kontu asko ez daudela indarrean, jakin-minez sortzen dira ea Twitter zer ote den ikusteko, baina gero, arrazoi ezberdinak direla medio, ez direla erabiltzen. %50? Gehiegi iruditzen zait, baina ez daukat daturik kontrakoa esateko. Bigarren arrazoiari ez nioke pisu handirik emango, euskara hutsez aritzen diren kontuetan spamerrak salbuespen direlako.

Nire ustez, tuiterlari euskaldun aktiboen kopurua 4.237 baino gehiago izango da. Umapek dioenez, 5.500-6.500 inguru? Baliteke. Agian gehiago, baina ez askoz gehiago. Duela hamar hilabete, Berriak 10.041 jarraitzaile zituen, eta egun 16.686. Hau da, hamar hilabeteetan 6.645 jarraitzaile berri egin ditu. Duela hamar hilabete, Argiak 4.764 jarraitzaile zituen eta gaur egun 8.367 (3.603 berri hamar hilabeteetan). Datu hauek erakusten dute Twitterren erabilpena indartsu hazi dela azken hilabeteotan euskaldunon artean. Zenbaiteraino dira aktibo? Bertxioak eta erantzunak egiteko baldintza ez nieke jarriko. Irakurri eta idaztea nahikoa litzateke, bederen hizkuntzaren ikuspuntutik.

Datuok, edozein modutan, erakusten dute euskaldunon komunitatea oso txikia dela inguruko erdal hizkuntzen ondoan. Korrontearen kontra ari dela. Horregatik, bereziki garrantzitsua da bilakaerak aztertzea, argazki errealagoak ematen dituztelako.

Euskarazko hedabide esanguratsu batzuen jarraitzaile kopuruaren bilakaera aztertuta, datuak ez dira oso baikorrak. Nabaria da jarraitzaile berriak egiteko gaitasun mugatua. Ondoko koadroa argigarria da:

Hedabideak eta Twitter

Noiz egin dute jarraitzaile berri gehien aztertutako euskarazko hedabideek? Guztiek iazko irailean, Argiak salbu. Aurten iaz baino jarraitzaile berri gutxiago lortu dituzte. Joera nabarmena da, Argiaren salbuespena kenduta (Argiak aurtengo otsailean lortu du jarraitzaile berrien kopururik handiena). Joera ez da oso itxaropentsua, eremu berrietara iristeko gaitasun mugatua erakusten duelako.

Jarraitzaile kopuruaren araberako sailkapenari dagokionez, badira zenbait aldaketa aurreko hilabeteekin alderatuta. Lehen hiru tokitan ez dago aldaketarik: lehena Berria da (apirilaren 30ean, 16.588 jarraitzailerekin), bigarrena Euskadi Gaztea Irratia (15.751) eta hirugarrena Argia (8.285). Hamaika Telebistak, berriz, jauzi egin du seigarren tokitik laugarrenera, Sustatu eta Euskadi Irratia aurreratuz. Halaber, eitb albisteak kontua aurreratu zaio Zuzeu orainkariari. Era berean, Topatu.info Hala Bediri aurreratu zaio eta Euskalerria Irratia Kazeta.infori.

Hedabideak Twitterren

Aurreikusteko modukoa zen. Denbora bat pasatuta, Twitter ez zen izango sare sozial soil bat. Ez zen izango bizitza soziala egiteko edo informazioa hedatzeko sare soil bat. Aurreikus zitekeen behatoki bat ere izan zitekeela, behatoki sozial bat, portaerak, gustuak, joerak eta abar luze bat aztertzeko tresna eraginkor bat, alegia. Hala gertatzen ari da, gero eta azterketa eta literatura gehiago da Twitterren erabilpenari buruz, baita gure inguruan ere.

Ildo horretan, interesgarria da Arkaitz Zubiagak egin duen azterketa estatistikoa Berriaren kontuan oinarrituta: “2012a, @berria eta euskaldunon ikuspegitik”. Jasotako bertxioen histograma osatu du, albiste nabarmenak lokalizatzeko. Erradiografia nahiko ona da. Neurri batean, ez guztiz, noski, bat dator berria.info-ren webguneko albiste bisitatuenen zerrendarekin. Edozein modutan, Twitterren bertxioen zenbaketa tresna eraginkor gisa agertu da intereseko gaiak bilatu eta aurkitzeko orduan.

Duela gutxi, bertxio marka berria ezarri da euskarazko albiste baten inguruan. 174 bertxio lortu ditu  Berriak argitaratutako “Hugo Chazez hil egin da” izenburuko albisteak, Sustaturen robotaren arabera.

chavezchavezhilda

 

Dena den, ikerketa batzuen arabera, Twitterren lagina ez da neurgailu ona gizartearen joera nagusiak antzemateko. Pew Research Center-ek zortzi gertakizunen inguruko ikerketa soziologikoak Twiiterren jarioarekin alderatu ditu. Ikerketaren ondorien arabera, “batzutan Twitterren hizketaldia inkesten erantzunak baino liberalagoa da, baina beste batzutan atzerakoiagoa”. Ikerketaren arabera, “Twitterren erabiltzaileak ez dira biztanleriaren adierazgarri”.

Duela aste gutxi, umap.eu tresna berritua jarri zen martxan. Tresna baliotsua da ikusteko zein izan daitezkeen hizpide nagusiak txiolari euskaldunon artean, traolak zenbatuz. Denbora epe ezberdinetan egindako neurketak laguntzen du ikusten zein diren gehien irauten duten gaiak ere. Agian umap.eu tresnak eskaintzen duen atalik ikusiena sailkapenarena izango da. Sailkapenak gustatu edo ez, jakin-mina pizten du. Gaurkoan, gehiago interesatzen zait euskararen erabilpena neurtzeko duen gaitasuna. Ez dut ikusten datu baikorrik, ez. Ez al da gutxi 2.980 erabiltzaile aktibo euskaraz? Zenbat erabiltzaile aktibo egongo da gaztelaniaz gure lurraldean? Egoera diglosiko honetan ez da harritzekoa politikari euskaldunen artean erdararen erabilera handia izatea. Kezkagarriena, tamalez, agintari politikoek ez ikustea lehentasunik euskara sustatzean edo euskarazko hedabideei baliabide ekonomikoak eskaintzean.

Bistan da euskarazko hedabideek zailtasun nabarmenak dituztela nabigatzeko interneteko erdal itsasoan. Hilabetez hilabete erabiltzaile berriak gehitzen jarraitzen dute, baina ez oso erritmo bizian. Otsailean izandako hazkundea urtarrilekoa baina pixka bat txikiagoa izan da. Otsailean, Berriak pilatu du jarraitzaile berri gehien: 604. Horren atzetik, Euskadi Gaztea (600) eta Argia (580) kokatu dira. Jarraitzaile kopuruaren araberako sailkapenean, aldaketa gutxi daude. Lehen hamarren artean, bakarra: Euskadi Irratia aurreratu zaio Hamaika Telebistari. Hona hemen, otsailari dagozkion datuen infogramak.

tw-sailkapena

 

tw-bilakaera

 

Irudia

Umap.eu tresna berritu da eta emaitza ona da, tresna erabilgarria da Twitterreko euskarazko jarduna jarraitzeko eta neurtzeko. Jarioa ikusi, joerak antzeman, sailkapena kontsultatu, euskararen erabilpen neurria, estatistikak… Erraz erabiltzeko tresna atsegina iruditu zait. Sailkapenak bizitasuna ematen dio, erkaketak egiteko eta kuxkuseatzeko balio duelako.

Sailkapena egiteko algoritmoak badu bere misterioa. Umap-en kudeatzaileen arabera,  “algoritmo bat aplikatzen die euskal tuiterlari guztiei, besteak beste ondorengo faktoreak kontuan hartuta: jarraitzaile kopurua, jasotako bertxioak, idatzitako euskarazko txioen interesa, eta abar”.  Irizpide horietan, jakin nahi nuke nola neurtzen duten txioen “interesa”. Hau da, mezuetako edukien balioa nola neurtzen den. Edukien balioa kualitatiboa delako. Berritasuna kualitatiboa den bezala.

Horrez gain, bada beste kontu bat begiz jo nauena: hizkuntza erabilpenaren kalkulua. Lehenik, nire emaitzei begiratu diet: Euskara portzentaia: %95.6. Errepasatu ditut nire urtarrileko eta otsaileko tuitak, baita bertxioak ere, eta denak euskaraz daude. Bestalde, kasualitatez, Berrian euskal politikari batzuen Twitter kontuen neurketa egin dugu azken hilabetan, ea zenbatean egiten duten euskaraz jakiteko (erreportajea bihar kaleratuko da). Umapek euskararen erabilera txikiagoa ematen die guztiei, guk neurtu duguna baino. Gure neurketan ez ditugu bertxioak kontuan hartu, ez direlako egilearen edukiak. Ez dakit hori ote den aldearen azalpena edo beste zerbait. Gorabehera hauek alde batera utzita, jarraitzeko moduko tresna osatu dute Umapeko sortzaileek.

Twitterren zabalkundeak handitzen jarraitzen du gure artean. Horrela erakusten du euskarazko hedabideen termometroak. Joan den abenduan, jarraitzaile berrien hazkundea mantsotu zen euskarazko hedabideen kontuetan, baina urtarrilean berriro azkartu da. Baina, hedabideen arabera, indartsuago edo motelago. Dena den, jarraitzaile kopuruaren araberako sailkapena kasik ez da aldatu. Lehen tokian Berria-k jarraitzen du, 14.472 jarraitzaileekin (abenduaren amaieran baino 668 jarraitzaile gehiago). Bigarren lekuan Euskadi Gaztea irratiaren kontua dago, 13.960 jarraitzaileekin. Indartsu gora, 686 jarraitzaile gehiagorekin. Hirugarren tokian Argia, 6.732 jarraitzailerekin, baita indartsu ere.   Laugarren tokian Sustatu-k segitzen du, 4.533 jarraitzailerekin (163 gehiago). Atzetik datozen bi hedabideek, Hamaika Telebista-k eta Euskadi Irratia-k hazkunde esanguratsua izan dute (309 eta 328 gehiago, hurrenez hurren).

Sailkapenaren lehen 25 tokietan, bi aldaketa izan dira. Batetik, Gaztezulo-k posizio bat irabazi du, Kazeta.info aurreratuz. Bestetik, Irrien lagunak Ukberri.net-i aurreratu zaio.

Hurrengo infogrametan, lehenik, euskarazko hedabideen sailkapena ikus daiteke, eta, ondoren, hedabide horietako batzuen bilakaera joan den ekainaz geroztik gaur arte.

hedabideak-tw-2013-01

bilakaera-2013-01

Erabilerak zehazten du tresna baten ahalmena. Twitterren kasuan ere. Hedabideen ikuspuntutik, bi funtzio nagusi betetzen ari da: batetik, gertaerak/albisteak zabaldu eta elkarbanatzea, eta, bestetik, gogoetak zabaldu eta elkarbanatzea. Bi kasuetan, Berria zeregin garrantzitsua izaten ari da, sarean zabaltzen diren albiste eta gogoeta askoren iturria baita. Sustatu albistariak eta bere robotak egunero uzten dute horren lekukotasuna.

Azken hilabetean, nire ustez, agerian gelditu da Twitterren mugetako bat. Albisteek zein gogoetek eztabaidak pizten dituzte. Eztabaida bideratzeko tresna gisa huts egiten du Twitterrek, besteak beste, 140 karaktereko muga dela eta. Une horretan blogak agertzen dira.

Nabarmena izan zen Lance Amstrong-en aitorpenarekin. Twitter sarean oso aipatua izan zen kontua, baina benetako eztabaida Xabier Usabiagak bere blogean idatzitako artikuluaren inguruan eraiki zen. Xabier Usabiagak gaztelaniaz idatzi zuen, eta euskarazko eztabaida Sustatu-n eman zen, albistearen erantzunetan.

Halaber, gurebook.com atariaren ixteari buruzko eztabaida eta gogoeta Mikel Iturberen Hamairu blogean abiatzen da, “DRMari buruz eztabaidatzeko aukera bikaina” izenburuko artikuluarekin. Gaiaren inguruko beste gogoeta interesgarri bat Berriaren papereko edizioan jarri zuen Alberto Barandiaranek asteroko zutabean: “Epubak eta aulubiak”. Eztabaidak jarraipena izan du. Batetik, Argia-n, Gorka Bereziartuaren Boligrafo Gorria blogean, “Gauzak argitzen ari dira liburu digitalaren merkatuan” izenburuko artikuluarekin. Bestetik, Hitzen uberan webgunean, Alexis Mindegiari eginiko elkarrizketa baten bidez, “Merkatuak ez du onartu” izenburukoa. Baita Markos Zapiainen eskutik ere, Zuzeu atarian: “Bake ederra”.

Azken asteotan izan dira beste eztabaida interesgarri batzuk blog batean postean oinarrituta. Esate baterako, Eneko Bidegainek Blogberri-n idatzitako “Estatistikak eta lurraldetasuna”.

Ez da harritzekoa, beraz, Goio Aranak idatzi berri izana: “blogak bigarren loraldia bizitzen ari dira interneten”.  Loraldia izan edo ez, kontua da gogoeta eta eztabaidarako tresna baliotsuak direla. Berriaren eskutik sortutako Ereiaro euskara kanala ere gogoetarako tresna emankor bihurtu da denbora gutxian, kolaboratzaileen parte-hartze handiak erakusten duenez. Baina badago zer hobetu. Eztabaidak aberasteko modua aurkitu behar da, bakarrizketen batuteka baino askoz gehiago izan daitezen.

Arrakasta handia izan du Twitter aplikazioak hedabideen munduan. Albisteak azkar zabaltzeko eta elkarren artean konpartitzeko tresna eraginkor bilakatu da. Euskarazko hedabideen kasuan, 2012 urtea hazkunde urtea izan da, Twitterreko jarraitzaile kopurutik begiratuta. Hilero jarratzaile berriak pilatuz aritu dira. Hazkunde hori, baina, abenduan moteldu egin dela dirudi. Hedabide gehien gehienek abenduan pilatutako jarraitzaile berrien kopurua azaroan pilatutakoa baino txikiagoa da. Denborak esango du masa kritikoarekin lotutako joera bat den, edo jai asko dituen abenduari bakarrik dagokion kontu bat.

Bestalde, euskarazko hedabideei dagokionez, twitter jarraitzaile kopuruaren araberako sailkapena ez da aldatu azarotik abendura. Lehen 25 postuak berdinak dira. Aipatzekoa da Euskadi Gaztea Irratiaren kontua izan dela jarraitzaile berri gehien pilatu duena (540). Honakoa da sailkapena, abenduaren 31n egindako neurketan:

twitter-sailkapena

Urteko bilakaera ikusteko, ekainetik abendura euskarazko hedabide batzuetako datuak bildu ditut, adibide gisa. Hedabide guztiek dute gero eta jarraitzaile gehiago. Hedabide handiek hazkunde handiagoa izan dutela erakusten du grafikoa. Logikoa den bezala, jarraitzaile gehiago duenak errazago zabaltzen du sarea. Beti daude salbuespenak, noski. Kurisitate gisa, ekainetik abendura, Hamaika Telebista Zuzeu albistariari gailendu zaiola, batez ere, irailean izandako hazkundeari esker. Hona hemen bilakaera:

twitter-bilakaera

 

Joan den asteartean, abenduak 18, Leizaola Elkargoak antolatuta, “Gutxitutako hizkuntzak natibo digitalen garaian” izenburuko mintegia izan da Bilbon. Bertan azaldutako gogoeta eta datu batzuk ekarri nahi ditut blog honetara.

Lehenik gogoeta orokorra: Euskararen erabilera sustatu eta bermatze aldera hedabideok berebiziko ardura dugu, eta gure eginkizunak garrantzi estrategikoa du. Hedabideok erabileraren akuilu eta berme gara aldi berean. Eginkizun horren balioa biderkatu egin da kultura digitalaren esparruan. Berria egunkariari dagokionez, esango nuke eginkizun hori eta ardura hori bere gain hartzeko prest dagoela eta datorren urtean jauzi bat egingo duela norabide horretan.

Paradoxikoa izan badaiteke ere, prentsa tradizionalak, egunkariok, oso toki garrantzitsua daukagu interneten. Besteak beste, albisteen erakargitasunaren eraginez, egunkarion webguneak oso bisitatuak dira, erreferentzialak dira, bakoitza bere lurralde edo eremuan.

Euskararen ikuspuntutik egoera ez da baikorra.

Gaztelaniazko hedabideekiko euskarazko hedabideen pisuak txiki izaten jarraitzen du. 2012ko udaberriko CIESen datuen arabera, Hego Euskal Herrian, gaztelaniazko hedabideen audientzia 11 aldiz handiagoa da telebistaren eremuan, 5 aldiz handiagoa irratiaren eremuan, ia 20 aldiz handiagoa egunkarien eremuan eta 40 aldiz handiagoa interneten munduan. Izan ere, azken datu hori (interneten ahulezia) da kezkagarriena.

bilakaera-2010

bilakaera-2012

CIES etxeak 2010 eta 2012an egindako azterketak alderatuz gero, gaztelaniazko hedabideen nagusitasuna nabarmena da. Bi urteotan proportzioa kasik ez da aldatu. Aldaketa esaguratsu bakarra gaztelaniazko hedabideek interneten eman duten gorakada da: %42,35ean hazi dira.

Aldea

Dena den, komeni da euskarazko hedabideei buruzko datu hauek erlatibizatzea, CIESen moduko inkestek ez baitute ongi jasotzen euskarazko komunikabide txiki eta atomizatutakoen zabalkundea.

Trakzio lana interneten

Etorkizunari begira jarrita, futsezkoa da euskarazko hedabideok trakzio lana ongi betetzea, batez ere, interneten eremuan. Gaur egun komunikazioa, funtsean, digitala da. Hedabideon eginkizuna trafikoa (erabilpena) aregotzea, zabaltzea, erabiltzaileak elkar lotzea eta elkarrizketak biderkatzea da.

Erronka horri erantzun ahal izateko inbertsio berezia behar da, iraultza digitala egin beharrekoa da, eta gaur egun euskarazko hedabideok baliabide ekonomiko instituzional gutxiagorekin erantzun behar diogu tamainako erronkari. Iraultza digitalak administrazioen sostengu gehiago behar du, asko baitago jokoan. Datu solte bat: informazioaren eta komunikazioaren teknologietan euskara sustatu, garatu edota normalizatzeko diru-laguntzetan 1.462.789 euro esleitu dira 2012ko abuztuan. Horietatik 372.818 bakarrik izan dira hedabideekin lotutako proiektuak garatzeko.

Kataluniarekin alderatuta

Erabilpenaren ikuspuntutik, Berriak nolabaiteko lidergoa du euskarazko internet espazioan. Berria.info euskarazko webgune bisitatuena dela esan daiteke. Baina posizio hori hobeto ulertzeko, Kataluniako eta Euskal Herriko egoerak alderatzea komeni da.

Koadro honetan, katalanezko hedabideek interneten duten bisita kopuruaren araberako mapa ikusten da. Datuak joan den urrikoak dira, OJD Interkatibak egindako neurketaren emaitzak. Neurketan ez dira ageri El Periodicoren katalanezko webgunea (elperiodico.cat) eta La Vanguardiaren katalanezko edizioa.

Tokia-CAT

Ondoko koadroa, datu ezberdinetan –zuzen eta zeharkakoak– oinarritutako estimazio bat da. Webgune bakoitzak urrian izandako bisita kopuruak islatu nahi lukeena.

Tokia-HEH

Bi kasuetan, Katalunian eta Euskal Herrian, lidergo konpartitu bat antzematen da. Bi polo nagusi daude: batetik, egunkari baten webgunea (Ara.cat eta Berria.info) eta, bestetik, telebista eta irrati publikoetako webguneak (batetik, tv3.cat, 324.cat eta catradio.cat, eta, bestetik, eitb.com). Katalunian, bistan da, egitura komunikatiboa orekatuagoa da.

Hedabideotako Twitter jarraitzaile kopuruak neurtuta honako “mapak” osatzen dira Katalunian eta Euskal Herrian.

Twitter-CAT

Twitter-EH

Ara eta Berria

Ara eta Berria egunkariak alderaztuz gero, datu interesgarriak eta bitxiak aurkituko ditugu. Ara.cat-ek 5.553.926 bisita izan zituen joan den urrian, OJD Interactiva-k egindako neurketaren arabera. Berria.info-k, berriz, 534.616 bisita izan zituen urrian, Google Analyticsen neurketaren arabera. Datu hauek katalan (Kataluniako eremua erreferentzia hartuta) eta euskaldun alfabetatuen kopuruekin alderatuz gero, antzeko ratio-a dute bi hedabideok: 1,11 Araren kasuan, eta 1,18 Berriaren kasuan.

Dena den, Araren kasua berezia da. Hedabide gaztea da, 2010ko azaroan sortu zen. Agian, horregatik, bere zabalkundea askoz handiagoa da interneten paperean baino. OJDren datuen arabera, 2012ko urtarriletik irailera, bataz beste, egunero 16.143 ale saldu zituen (horietatik 3.128 harpidetzaren bidez). EGMren azken azterketaren arabera (2012ko otsailetik azarora), eguneko 97.000 irakurle izango lituzte Arak. El Punt-Avui egunkariaren paperezko edizioak emaitza hobeak ditu, EGMren neurketa beraren arabera: 146.000 irakurle eguneko. Baina interneten alde nabarmena ateratzen dio Arak El Punt-Avuiri. Joan den urri osoan Ara.cat-ek 5.553.926 bisita izan zituen, eta, ElPunt-Avui.cat-ek, ordea, 1.635.377.

Berriak 10 urte

Berriak datorren urtean, ekainaren 21ean, 10 urte beteko ditu, eta urteurrena baliatuz jauzi bat egin nahi du euskara interneten hobeto kokatzeko ahaleginean. Honako osagaiak izango ditu:

  1. Erredakzioaren eginkizuna birmoldatzea, berehalakotasunari hobeto erantzuteko eta eduki interesgarri eta landuak eskaintzen jarraitzeko.
  2. Eduki guztiak guztientzat. Eduki guztiek guztien eskura izaten jarraituko dute, eta euskuragarriago egongo dira (diseinua eta antolaketa berrituz eta bilatze sistema hobetuz).
  3. Multiplaforma gisa garatuta (euskarri eta formato guztietara egokituta).
  4. Multimedia izaera zainduta (testua, irudia, audioa eta bideoa baliatuz eta uztartuz).
  5. Parte-hartzailegoa (aukera gehiagorekin parte hartzeko eta proiektuaren parte izateko).