Dolu egun hura

2014/03/11 — Utzi iruzkina

M11-azala

Martxoak 11. Badira ibilbide profesionala markatu egiten duten gertaerak. Gaur duela hamar urte, 2004ko martxoaren 11n Madrilen izan zen sarraskia horietako bat da. Euskal hedabideok asko izan genuen jokoan egun hartan eta ondokoetan. Berrian lan ona egin genuelakoan nago. Egun beltz horretan osatu genituen 23 orrialdeak ahalegin horren lekukoak dira.

Sukaldeko irratiaren bidez izan nuen atentatuaren berri. Zapping egin nuen emisora ezberdinen artean, lehen datuen erradiografia osatze aldera. Lehen datuekin –leherketa ugari, tren ezberdinetan, tren mota, biktima mota eta kopurua (ordu hartan, 80 inguru aipatzen zen),…– nire lehen inpresioa argia izan zen: hau ez da izan ETArena izan. Orduko zuzendariorde Xabier Lekuonari hots egin nion, eta biok inpresio bera genuen, Madrilgo sarraskia integrista islamiarren ekintza bat zela eta ez zuela zerikusirik ETArekin, alegia.

Hasierako analisi hori zuzena zela pentsatu nuen egun osoan, egun tragiko eta, informazioaren ikuspuntutik, egun ero hartan. Datu uholde nahasi eta kontraesankorren artean, ez zegoen denbora askorik gertaerak hotz eta sakon aztertzeko, lan talde oso bat antolatu behar zelako ahalik eta hedapen informatiborik hoberena eta osatuena eskaintzeko.

Zurrunbilo handi haren erdian, iluntzean, analisi bat idatzi nuen, eta hor gelditu da betiko hemerotekan. Hona hemen, hitzez hitz, 2004ko martxoaren 11ko egun hartan bizi izandakoaren lekuko.

Dolu eguna, mugarri izango den eguna

Madrilek Irailaren 11ko amesgaztoa bizi du. Madrilgo lau trenetako bidaiarien kontrako leherketek utzitako ondorioen neurria (190tik gora hildako, milatik gora zauritu…) eta tragedia horren guztiaren irudiek New Yorkeko Dorre Bikien kontrako erasoaren oroimena berpiztu dute. Madrilen heriotza, izua, odola eta dolua nagusitu dira eta ondoren han eta hemen barreiatu dira. Barru-barruraino. Biktimak langile auzoetatik trenez abiatutako herritarrak dira, herritar xumeak, adin guztietakoak. Sarraskia neurririk gabekoa izan da. Horrelakorik Euskal Herritik urruti ikusi izan ditugu orain arte. Azkenaldian, sarraskien irudiak Irak inbaditutik (gerra eta gerrondoa), Txetxeniatik, Errusiatik, Palestina eta Israelen arteko gatazka lekutik eta munduko beste zenbait tokitik… iritsi dira. Europako Batasunean ez da horrelakorik gertatu hegazkinen kontrako atentatuak kenduta (1985an Irlandako kostaldetik gertu eta 1988an Lockerbien, Eskozian). Europako Batasunaren ingurura begiratuz gero, azkenaldian, Tangerren (Marokko) eta Istanbulen (Turkia) izandako atentatuak gogora datoz. Lehena Espainiako interesen kontra eta bigarren Erresuma Batuen interesen kontra (abenduan). Azken bi aurrekari hauek ikusita, eta, oro har, Irailaren 11az geroztiko egoera kontuan hartuta, eta Madrilgo tragediaren tamaina ikusita logikak ekintzaile islamisten eremura begiratzen du. Atzo eguerdian egiletza ez zegoen argi. Horrela aitortu Europoleko zuzendariak. Ez zegoen argi, Espainiako Barne Ministerioak ETAri egotzi arren. Eguerdi aldera, zalantzarik gabe egin zuen, arratsaldean, berriz, beste hipotesi batzuk (hari islamista) baztertu gabe. 13:30eko agerraldian ETAri leporatu zion ardura, baina datu zehatzik aurkeztu gabe. Argudio bakarra ETA Madrilen atentatuak egiten saiatu dela gogoratzea izan zen. Arratsaldeko agerraldian beste ikerketa ildo bat irekitzeko zantzuen aurkikuntza aitortu zuen. Hortik aurrera, egiletza islamistaren hipotesia indartu zen.

ETAren jarduera armatuaren eta diskurtso politikoa aztertuta (Kataluniarako su-etena barne), Madrilgo triskantzaren ardura bilatzeko beste norabaitera begiratu behar dela dio logika hotzak. Halaber, logikak dio, lehenago edo beranduago, Irailaren 11ko erasoaren ildoa jarraitzen dutenek Iraken inbasioa sostengatu eta bultzatu zutenen kontra -AEB, Erresuma Batua eta Espainia- eraso egingo zutela. Denbora beharko da gertutakoa argitzeko eta ETAren hitza entzun beharko da. Dena dela, Al Kaedaren inguruko taldeen mehatxua benetakoa izanik, ez da ulertzen hainbat arduradun politiko eta agintarik zuhurrago ez jokatu izana. Are gutxiago, ezker abertzaleko ordezkari kualifikatuek ziotenean ETAren ardura ez zutela onartzen ezta hipotesi gisa. Azkenean, Al Kaedaren inguruko egiletza baieztatzen bada, nork hartuko du bere gain hutsegitearen ardura?

Gertatutakoa, hala ere, mugarri bat izango da euskaldunontzat ere. Martxoak 11 memorian grabatuta geldituko da. Honelako sarraskiekin lotzeko aukerarik egon ez dadin hartu beharreko neurriak areagotu eta azkartzea ekarriko du. Gainera, Estatuak emango dion erantzunak, ETAk zerikusirik izan gabe ere, giza-eskubideak murriztea ekarriko du euskaldunontzat ere. Irailaren 11aren osteko gurutzadak jarraipena izango du.

(BERRIA, 2004-03-12)

Gero eta herritar gehiagok eskuratzen du informazioa Interneten bidez. Azkar, noiznahi eta nonahi informatzeko modua da. Eskari horri erantzuten lan handia egiten ari da BERRIA; izan ere, sarean euskaraz informatzeko iturri nagusia baita. Horren lekuko da 2013an izandako bisita kopurua: 5.486.478 bisita eta 1.467.315 bisitari bakar.

Urte osoko trafikoaren bilakaerari so eginik, egunetik egunera oso gorabeheratsua dela antzematen da, hau da, informazioaren erritmoaren araberakoa. Astegunetan biziagoa da, eta asteburuetan apalagoa. Udaberriko eta udazkeneko hilabeteak izaten dira aktiboenak. Eta udan eta Gabonetan nabaritzen da moteltze handiena.

Herrira-ren aurkako operazioarekin jo zuen goia

Irailaren 30a izan da BERRIAren webguneak bisita eta bisitari bakar gehien izan duen eguna, hain zuzen, Herrira-ren kontrako polizia operazioaren eguna. Egun hartan, 30.130 bisita izan zuen BERRIA.INFOk. Urtean zehar, beste une bero  batzuk ere izan dira interes informatiboaren ikuspuntutik, Google Analyticsen datuetan oinarritutako grafikoak erakusten duenez.

Urtarrilean, adibidez, presoen eskubideen aldeko manifestazioak eragin zuen hazkunde nabarmen bat ohiko trafikoan. Martxoan, 18. Korrikaren hasiera nabarmendu zen. Apirilean, berriz, Donostiako Bulebarrean gazte batzuen atxiloketa eragozteko Askeguneak piztu zuen jakin-mina, maiatzean Ondarroakoak egin bezala.

Urrian, Europako Giza Eskubideen Auzitegiak 197/2006 doktrina baliogabetuz kaleratutako epaiak eta horren ondorioz Ines del Rio presoaren askatzeak beste jauzi bat eragin zuen trafikoan. Azaroan, berriz, bisita gehien bildu zuen eguna Alex Salmond Eskoziako gobernuburuak Independentziarako Liburu Zuria aurkeztu zuenekoa izan zen. Abenduan, Bertsolaritza Txapelketako finalak eragindakoa izan zen hileko gailurra.

‘Osakidetza, maitasuna hodietan’

Webguneko trafikoaren une gorenak gertakari garrantzitsuenek markatu ohi badituzte ere, badira beste artikulu mota batzuk asko irakurtzen direnak, albiste garrantzitsuak edo albiste hutsak ez direnak. Adibidez, BERRIAren webgunean gehien irakurritako aleetako bat Andoni Aizpuruk Iritzi Sailean argitaratutako Osakidetza, maitasuna hodietan artikulu hunkigarria izan da (5.726 bisita).

Halaber, Pako Aristik joan den uztailean argitaratutako Euskal Herria 2023. Kristalezko bola artikulua ere jende askok irakurri zuen (2.324 bisita). Era berean, bi elkarrizketak izan dute oihartzun handia sarean: batetik, Iñigo Astitz kazetariak Natxo de Felipe musikariari apirilean egindakoa, Euskal kulturaren kontu hau gezur monumental bat da izenburukoa  (3.546 bisita); bestetik, Lander Arbelaitz Argia-ko kazetariari egindako elkarrizketa digitala (3.340 bisita).

Sarea, gero eta mugikorrago

2013. urteak emandako datuetan Internet gero eta mugikorragoa dela antzematen da. 2013. urte osoan, BERRIAren trafikoaren %21,62 mugikorra izan da, hau da, sakelako telefono eta tableten bidez bideratutakoa. Aurreko urtearekin alderatuta, portzentajea ia bikoiztu egin da (2012an, %11,15 izan zen mugikorra). 2013an ere nabaritu egin da mugikortasunaren aldeko joera: urtarrilean, trafikoaren %16,79 izan zen mugikorra, eta abenduan, 26,36 izan da.

Ondoko grafikoan ikusten da nolako garrantzia hartzen ari den gailu mugikorren erabilera informazioa eskuratu eta elkar banatzeko orduan. Berriaren sareko irakurlea gero eta gehiago erabiltzen ditu gailu mugikorrak (telefono eta tabletak).

Berriaren webguneak izandako bisitak, gailu motaren arabera.

Berriaren webguneak izandako bisitak, gailu motaren arabera.

 

Bereziki bi aldagai ari dira bultzatzen trafiko mugikorra. Batetik, smartphone eta tableten merkatuaren zabalkundea, eta, bestetik, Twitter sare sozialaren hazkundea. BERRIAren Twitter kontua horren lekukoa da: 2013ko urtarrilean 13.803 jarraitzaile zituen BERRIAk Twitterren, eta urtea 21.973 jarraitzailerekin amaitu du (8.170 jarraitzaile berri, % 59,19ko hazkundea).

Webgunea berritzen

Joera, eskari eta nahi horiei ahalik eta hobekien erantzuteko, edizio jarraitua berritzeari ekin zion BERRIAk duela hainbat hilabete. Lanak aurreratuta daude, eta ez da asko falta webgune berritua abian jartzeko. Aldaketa sakona ekarriko duenez, era progresiboan sareratuko da.

Webgunearen aldaketa osoarekin batera, telefonoetara eta tabletetara hobeto egokitutako diseinua garatuko da. Izan ere, euskarazko informazioa ahalik eta herritar gehiagorengana zabaldu eta eskurago jartzeko helburuak gauzatu nahi ditu BERRIAk hasi berri den urte honetan.

Proiektu berriak, sarean

Horretaz guztiaz, aipatzekoak dira BERRIAk 2013an abian jarri dituen beste egitasmo batzuk. Apirilean mendiko kanala sortu zen, Ibilkari. Arrakasta handia izan du bai blogarien artean eta bai Interneteko erabiltzaileen artean ere. Twitterren ere bere kontua du. Maiatzean, Ipar Euskal Herriko Hitza-k webgunea abiatu zuen: “Euskararen plaza berria“.

Uda aurretik, BERRIAren estilo liburuak eman zuen sarerako jauzia: “tresna berria eta erabilgarria“. Twitterren ere denbora gutxian milatik gora jarraitzaile lortu ditu. Azkenik, BERRIAren webguneko urteko apustu garrantzitsuenetako bat urrian heldu zen, GAL 30 urte gune multimediarekin. BERRIAko lantalde zabal batek GALi buruzko lan mardula sareratu zuen, dokumentazioan eta elkarrizketetan oinarrituta.

(Oharra: artikulu hau Berriaren webgunean argitaratu zen urtarrilaren 3an. Orduko bertsioari grafiko bat gehitu zaio).

Durangoko gogoetak

2013/12/09 — 2 iruzkin

Kabiak gonbitea eta puntua jarrita, “Eduki digitalak eta etorkizuneko eredu posibleak” gaiaren inguruan aritu gara Durangoko Azokan Ion Telleria (Naiz-Gara), Olatz Osa (Elkar), Gorka Arrese (Susa) eta laurok. Ikuspegiak alderatu, eztabaidatu eta gogoeta egiteko aukera egon da. Bertan entzule gutxi, zarata gehiegi eta hotz handia, baina luze eta gustura aritu gara. Jarraian, solasaldirako prestatutako gogoetak eta grafikoak azalduko ditut, eskurago izan daitezen.

ABIAPUNTUAN, GOGOETA BAT

Ara egunkariak 3 urte bete berri ditu, joan den azaroaren 28an. Horren harira, lan multimedia berezi bat argitaratu du: Tres anys de periodisme. Bertan, Antoni Bassas Arako editorearen honako gogoeta dago.

“Ez gara paperezko egunkari bat, webgune bat ere baduena. Hedabide multiplataforma bat gara, paperezko egunkari bat ere baduena. Eta webgune bat ere baduena, irratia bezain azkarra, telebista bezain erakargarria, papera bezain sakona eta tuit bat bezain argia izan nahi duena”

(Antoni Bassas, Arako editorea)

Duela hamar urte, Euskaldunon Egunkaria itxi ondoren, Berria jaio zenean ez zen paperean bakarrik jaio. Batera, interneten ere jaio zen, baina esango nuke 2003an Berria papereko egunkari bat zela, webgune bat ere bazuena. Gaur egun, ordea, Berria Antoni Bassasen definiziotik gertuago dagoelakoan nago. Etorkizunari ikusmolde horretatik begiratzen dio. Baita hedabide multiplataforma bat baino zerbait gehiago badela sinistuta ere.

EREDU EKONOMIKOAREN ALDAKETA

Azken urteotan milaka eta milaka hitz esan eta idatzi dira hedabideen krisiari buruz. Hala ere, euskarazko hedabideak beti egon gara krisian, beti egoera zailean, bideragarritasun ekonomikoa zalantzan. Gizartearen bultzadari esker sortu gara, baita garatu eta iraun, eta, aurrerantzean, bultzada horri esker egingo dugu aurrera.

Azken hamarkadan, hedabideen eredu ekonomikoa aldatu da. Hamaika faktore elkartu dira krisia biderkatuz. Berriaren kasuan, eredu ekonomikoaren aldaketa eragin duen faktore nagusia publizitatearen atzerakada izan da. Diru sarreren ikuspegitik, era kritikoan aldatu den parametro bakarra publizitatea izan da. Esan genezake eduki fisiko eta digitalen arteko gorabeherak ez duela eragin nabarmenik izan ikuspuntu ekonomikotik. Horixe adierazten du diru sarreren bilakaerak:

Berriaren diru sarreren bilakaera (Ustiapen emaitzak, 2004-2012)

Berriaren diru sarreren bilakaera (Ustiapen emaitzak, 2004-2012)

Grafikoen argi ikusten denez, aldaketa sakona (beherakada) izan duen parametro bakarra publizitatea izan da. Bi faktore nagusi pilatu dira publizitatearen beherakada eragiteko orduan: interneten eraginez publizitatea egiteko moduaren aldaketa eta krisi ekonomikoa (publizitaterako aurrekontu murrizketa enpresa eta instituzioetan).

Salmentaren marra egonkorragoa da, baina antzematen zaio hazkunderako nolabaiteko ezintasuna eta beheranzko joera. Bestelako sarreren zati handiena diru-laguntzei dagokie, eta antzematen da beherazko joera krisiaren aurrekontuen ondorioz.

Sarreren egitura aztertzea interesgarria da ere. Eredu aldaketa era grafikoan antzematen da, adibidez, 2008ko sarreren egitura 2012koarekin alderatzen badugu:

Berriaren diru sarreren egitura (2008/2012).

Berriaren diru sarreren egitura (2008/2012).

Publizitatearen beherakadak desorekatu egin du diru-sarreren egitura, azken lau urteotan. Pisu gehiegi salmentaren bizkarrean. 2012ko diru-sarreretan, zorionez, elementu berri bat ageri da ez ohiko sarreretan: berrialagunak (%5). Paradigma berri baten hasiera da, baina oraindik pisu gutxi du ikuspegi kuantitatiboan. Bestalde, nabarmentzekoa da bestelako sarreren multzoak (diru-laguntzak + promozioak) ez duela pisu handirik diru iturrietan (batez ere, tokiko hedabideek duten finantzaketa publikoarekin alderatuta: %33tik %42ra bitartekoa, Tokikomen azken txostenaren arabera).

Gastuen bilakaera aztertzen badugu, parametroen egonkortasunaz ohartuko gara. Hau da, gastuak murrizteko zailtasunaz.

Berriaren gastuen bilakaera (2004-2012).

Berriaren gastuen bilakaera (2004-2012).

Gastuen egitura alderatuz gero antzeko egoera erakutsiko du:

Berriaren gastuen egitura (2008/2012).

Berriaren gastuen egitura (2008/2012).

AURRERA BEGIRA, ASMATU BEHARRA

Etorkizuna egon badago hedabideentzat, baita Berria bezalako hedabide batentzat. Baina asmatu beharko da. Nire ustez, honako hiru arlotan asmatu beharko da:

1. Eginkizuna

Eginkizunak ematen dio zentzua hedabide bati edo beste edozein proiektuari. Eginkizun hori ongi definitzea, garai bakoitzera egokitzea, eta gizartearen nahi eta beharrekin ongi lotzea funtsezkoa izango da.

Adibidez, Berriaren eginkizun anitzaren zirriborro bat honako hau izan daiteke:

– Berehalako informazioa eman

– Informazio landua eskaini

– Euskara normalizatzeko tresna izan

– Kulturgintza suspertu

– Iritzi eta gogoetarako elkargune izan

– Gizarte mugimenduen ispilu

– Gazteak euskarara lotzeko tresna izan

– Nazio ikuspegia landu

-…

2. Edukiak

Hedabide batek eskaintzen dituen edukietan ere asmatu beharra dago. Garrantzitsua da eduki horiek herritarren nahi eta beharrekin lotuta egotea. Horretarako, garrantzitsua da irakurle eta jarraitzaileekin harremanetan egotea, adi.

Duela gutxi, esate baterako, Berriak inkesta moduko bat egiten ari da, Berria berritzeko prozesuan haien iritzia eman dezaten. Galdera horietako batean eskatu diegu adierazteko zer gustatzen zaien irakurtzea. Hitzen laino honetan islatzen dira jasotako lehen erantzunak:

gustuak

3. Forma/formatoa

Edukiak era, diseinu eta formato ezberdinetan eskaintzen asmatu beharko du hedabide batek etorkizuna bermatzeko. Era integralean eta koherentean, baina eskaintza dibertsifikatuz. Ohitura, behar eta une ezberdinetara egokituz.

ETORKIZUN EKONOMIKOAREN GAKOAK

Labur bada ere, hedabide baten kasuan, hiru gako nabarmenduko nituzke bideragarritasun ekonomikoaren ikuspuntutik.

1. Diru sarrerek oinarri eta jatorri anitza izan behar dutela onartzea.

Horrek esan nahi du eskaintza dibertsifikatu behar dela eta eremu berriak esploratu beharra dagoela, beti ere finkatutako eta komunitateak onetsitako eginkizunari lotuta.

2. Komunitatean ongi txertatzea.

Parametro berrietan, komunikazio gehiago eta eraginkorragoaren bidez, eta benetako parte-hartzea ahalbidetuz. Berriak norabide horretan bidaia bat abiatu du: berrialagunak. Bidean sakondu eta urruti iristeko asmotan abiatu, izan ere.

ziztadaalboa

Komunitatea era irekian ulertu behar dela uste dut. Azken batean, Berriaren komunitatea euskal hiztunen komunitatea da, beste hainbat proiekturekin konpartitzen dena.

3. Berrikuntza

Hedabideen munduan etengabeko berrikuntza ezinbesteko bilakatu da. Horregatik, Berria berrikuntza prozesu sakon batean murgilduta dago:

– laster webgunea berrituko da

– paperezko edizioa ere berritze prozesuan dago

– euskarri mugigorretarako eskaintza ere berrituko da

– Badok musika ataria ere eraldatuko da

– eta gehiago

ESPLORATU BEHARRA

Berrikuntza prozesu hauetan, begi bat irakurle-erabiltzailearengan eduki behar da eta bestea munduan zehar gertatzen ari diren aldakuntzetan. Esploratu beharra dago, han eta hemen.

Arlo eta euskarri guztietan daude aukerak. Asmatu daiteke, edo huts egin. Baina esploratu beharra dago.

Hona hemen hiru adibide:

1. The Guardianen robota

Esperimentu bat da. Robot batek formato luzeko artikuluak aukeratzen ditu, eta bildumarekin paperezko astekari bat egiten du: The long good read. Londreseko kafetegiren batean dohan banatzen du, froga gisa.

The Guardianen The long good read astekaria.

The Guardianen The long good read astekaria.

2. Liberationen liburutegia

Duela aste batzuk, liburutegi digital bat martxan jarri du Liberation egunkariak. Gai baten inguruko artikulu bildumak dira, epub formatoan eskainita, 2,90 euro aleko.

Liberationen liburutegia.

Liberationen liburutegia.

3. Narratiba multimedia

Narratiba multimedia etorkizuneko kazetaritzaren zutabeetako bat izango da. New York Timesek edo The Guardianek ale ederrak eskaini dituzte azkenaldian. Baina Ara egunkariak ere, hirugarren urteurrenaren harira. Merezi du Araren lan multimedia berezia bisitatzea.

Tres anys de periodisme. Araren lan multimedia berezia.

Tres anys de periodisme. Araren lan multimedia berezia.

Bezosen eskua

2013/09/08 — Utzi iruzkina

Jeff Bezos Amazon enpresaren sortzaile aberatsak erosi ondoren, ikusmin berezia dago hedabideen munduan Washington Post egunkariaren bilakaeraren inguruan. Joan den astean, Jeff Bezosek lehen bisita egin dio erosi berri duen enpresari. Lehen hartu-emanak izan ditu Posten arduradun eta langileekin, eta lehen elkarrizketa eskaini du. Ez du aparteko estrategiarik azaldu. Goiz da oraindik. Baina bere hitzek badute interesa. Gustatu zait bereziki Clasesdeperiodismo.com webguneak egin duen sintesia. Zazpi ideia nabarmendu ditu, labur eta zuzen.

1. “Jarri irakurleak lehen tokian, ez iragarleak”.

2. “Ez idatzi besteak inpresionatzeko”.

3. “Ez izan aspergarria”.

4. “Onartu beharra dago inpresio fisikoaren negozioa gainbeheran dagoela. Onartu behar da eta aurrera egin”.

5. “Edozein enpresentzat heriotza epaiaren modukoa da iragana goraipatzea”.

6. “Negozio guztiek beti gazte izan behar dute”.

7. “Ez gara perfektuak. Jakin beharrekoa: nola egin ditzakegu gauza berriak?”.

 

WP


Washington Posten webgunearen irudi bat. Bertan Jeff Bezosi (argazkian, ezkerrean) egindako elkarrizketa ageri da, Style sailean argitaratuta.

 

Paperari lotuta ibilitako kazetariontzat garrantzitsua da onartzea eta barneratzea inpresio fisikoaren jarduna gainbeheran dagoela atzera bueltarik gabe, ikuspuntu ekonomikotik zein kazetaritzaren beraren ikuspuntutik ere. Gaur egun, ‘Informazioaren Txapeldunen Liga’ interneten jokatzen da, eta ez paperean. Informazioaren transmisio denbora aldatu da (paperaren zikloa zama bilakatu da). Informazioaren transmisio unitatea ere aldatu da (albistea bera bilakatu da ale). Eta informazio eskaria internetera mugitu da.

Bezosek Washington Posten egin ditzakeen aldaketak interesgarriak izango dira. Beharbada, egunkaria errentagarri bilakatzeko egin dezakeena ezin izango da gurera ekarri. Eredu ekonomikoa ezin izango da inportatu, New York Timesen eredu ekonomikoa inportatu ezin dugun bezalaxe. Baina adi jarraitu beharko da zer eta nola egiten duen interneteko eskaintza hobetu eta proiektuaren erdigunean jartzeko.

 

 

Sorkuntza nekeza da. Zerbait berria asmatzea ez da bat ere erraza. Berrikuntza garaiak dira hedabideetan, eta berrikuntzen atal garrantzitsua izaten da diseinua. New York Times egunkaria webgunea berritzen ari da, eta diseinu berriaren prototipoak erakusten ari da, NYT egunkariaren diseinu berriaren arrastoan izenburuko postean aipatu bezala. Duela egun batzuk, Liberation egunkaria hasi erakusten bere diseinu berriaren beta bertsioa. Egia esan, Liberationen webgunea astindu bat behar zuen (Berriarenak bezala), eta beta bertsioan ikusten denez jauzi nabarmen bat egingo du. Baina ez da oso berritzailea izango. Dagoeneko beste hedabide esanguratsu batzuek finkatu duten eredua hautatu duelako. Azalaren lehen pantailaren egitura beretsua aurkitu ahal dugu beste hedabide batzuetan: Time, Boston Globe, Reuters (beta)…

Antzekotasunak begi bistakoak dira:

Time aldizkariaren webgunea.

Time aldizkariaren webgunea.

 

The Boston Globe egunkariaren webgunea.

The Boston Globe egunkariaren webgunea.

 

Reuters albiste agentziaren webgunearen beta bertsioa.

Reuters albiste agentziaren webgunearen beta bertsioa.

 

Liberation egunkariaren webgunearen beta bertsioa.

Liberation egunkariaren webgunearen beta bertsioa.

 

 

Nabarmena da antzekotasuna batez ere Time, Reuters eta Liberationen diseinuen artean. Albiste nagusairen argazkia eta titularra  kokatzeko modua, alboko albisteen titularrak, bigarren mailako albisteak argazkiez lagunduta aurkezteko erea….

Bi apostu daude diseinu eredu honen atzean: 1. Lehenengo pantailan unean uneko albiste garrantzitsuak eskaintzea era argi batez. 2. Sinpletasuna eta argitasuna, aurkezpena eraginkorra izan dadin.

Nire gusturako, bertsiorik hoberena lehena da, Timerena. Letra tipoengatik, estiloagatik, elementuen arteko orekagatik…

 

Maiatzean jauzi bat nabari da euskarazko hedabideen munduan, Twitterreren erabilerari dagokionez. Jarraitzaile berrien kopuruak gora egin du modu orokor batean. Joera hau, neurriren batean, bat dator Umap-en robotak atzemandako tuiterlari aktiboen kopuruaren bilakaerarekin. Joan den apirilean, 5.292 tuiterlari aktibo eta eguneko euskarazko 8.378 mezu  atzeman zituen. Maiatzean, berriz, 5.413 tuiterlari aktibo eta eguneko 8.902 mezu. Aktibitatea hazi da, neurri txikian bada ere.

Euskarazko hedabideen datuak kontuan hartuta, maiatzean bizkortze bat gertatu dela jarraitzaile berrien kopuruari dagokionez. Hedabide aktiboenak dira emaitza hoberenak lortzen dituztenak (Berria edo Argia adibidez). Maiatzeko datu hauekin lotuta egon daiteke Askegunea bezalako fenomeno soziala. Holako egoeratan oso erabilgarri bilakatzen delako Twitter bezalako tresna bat.

Jarraitzaile kopuruaren araberako sailkapenean, hilero bezala, aldaketa gutxi daude. Lehen lau postuak apirilean bezala daude maiatzaren 31ko datuetan: 1. @berria (17.470), 2. @gaztea (16.261), 3. @argia (9.019), eta 4. @HamaikaTb (5.311). Bosgarren postua @euskadi_irratia-k kendu dio @Sustatu-ri. Horrez gain, Tolosaldeako Hitzak irabazi du postu bat.

Hona hemen euskarazko hedabideen sailkapena, Twitterreko jarraitzaile kopuruaren arabera:

sailkapena-maiatza-2013

 

 

Hona hemen, hedabide batzuen bilakaera, jarraitzaile berrien kopuruaren arabera:

 

jarraitzaile berriak-05

New York Times egunkaria bere webgunea birdiseinatzen ari da, sakon berritzen ari da. Joan den martxoan, diseinu berriaren prototipoaren zati bat erakutsi zuen, eta gehiago ikusi nahi izanez gero horretarako gonbidapena eskatzeko aukera eman zuen. Aste honetan bertan eskuratu dut diseinu berrian esploratzeko aukera, eta interesgarria izan da ikusitakoa. Intersgarria batik bat Berria.info webgunearen diseinu berria lantzen ari den lan taldearentzat. Martxoan ikusitako zatia gustatu zitzaigun, eta irudipena sendotu da orain ikusi ahal izan dugunarekin. Estilo berri bat landu du, ildo bat markatu dezakeena.

Hona hemen martxoan erakutsitakoaren kaptura bat. Erreportaje baten adibidea da. Letra tipo lodi eta beltzak eta argazkiaren kokapenak (goian, eskuin aldean) begiz jotzen dute. Horrekin batera, sinpletasuna eta argitasuna, edota menuaren minimalismoa.

NYTen diseinu berriaren prototipoa.

NYTen diseinu berriaren prototipoa.

 

Aste honetan zabaldutako aukerari esker, menu minimalista horren zehaztasun gehiago ikusi ahal izan dira. Albisteak erakusten dituztenean menua sinplifikatu egin dute: lerro batean Sections, Home eta Search kokatu dituzte, eta bigarrenean gai nagusien selekzio bat ezker-eskuin mugi daitekeen zinta batean.

Captura de pantalla 2013-05-21 a la(s) 15.19.35

 

Albistea irakurri ahala, beheraka egitean gai nagusien zinta hori desagertuko da eta soilik menuaren ikurra eta albistearen titulua geldituko dira ikusgai. Menuaren botoian klik eginez gero, errezel bertikal bat desplegatuko da ezker aldean.

Menua, goitik behera.

Menua, goitik behera.

 

Menuaren ikurrei kasu eginez, telefono mugikorretan eta tabletetan erabiltzen den ikonografia aukeratu dutela ohartuko gara. Baina hori ez da tabletei egin dieten keinurik garrantzitsua. Alboetan kokatuta dauden gezien bidez ezker-eskuin nagibatu daiteke albiste batetik bestera.

 

Alboetako gezien bidez albistez albiste nabigatu daiteke.

Alboetako gezien bidez albistez albiste nabigatu daiteke.

 

Albistearen elementu osagarriak eta lotutako albisteak asko zaintzen dituzte NYTen diseinu berrian, baina beti soiltasunez aurkezten dituzte, albistearen testuaren eskuin aldean, batzutan urdina erabiliz. Iruzkinak albistearen amaieran erakusten ditu, modu sinple eta erakargarrian.

 

Iruzkinei garrantzia ematen diete.

Iruzkinei garrantzia ematen diete.

 

Diseinuaren ikuspuntutik, beste eredu interesgarri bat Reuters albiste agentziarena da. Hau ere aldaketa prozesuan dago.

Hona hemen diseinu zaharra:

 

Reuters agentziaren egungo diseinua.

Reuters agentziaren egungo diseinua.

 

Eta hau da diseinu berriaren prototipoa:

Reuters agentziaren diseinu berriaren prototipoa.

Reuters agentziaren diseinu berriaren prototipoa.

 

Argi dago, badago zer eta nondik ikasi.